Temba Travel


MEISIE-VASBYT 2019

20 Sept tot 30 September 2019

BESPREEK NOU>>


“Temba Kollege is trots op ons uitstaande verhouding met talle skole. Geen skool is egter betrokke by enige van ons projekte nie en geen skool aanvaar verantwoordelikheid vir ons projekte nie.”

Tel: +27 (0) 21 855 0395

Okavango Vasbyt vir jongdames.

Uiters Belangrik:

Die Meisie-Vasbyt is nie 'n oorlewingskamp nie. Jy kry uitstekende kos, wat daarop gemik is om jou optimaal te laat presteer. Dit is 'n fisiese en emosioneel moeilike leierskapskursus. Sedert 1987 maak die Kalahari-Vasbyt ʼn verskil in jongmanne se lewens. In 2014 was die eerste Meisie-Vasbyt 'n reuse sukses. Tog het ons dit eers in 2018 herhaal en dit gaan waarskynlik nou ’n instelling word.

 

 

Soos die seuns se kursus is die Meisie Vasbyt ook fisies en geestelik moeilik. Die wetenskaplike basis waarop dit aangebied word verseker dat jy dissipline leer en fiks word sonder om verneder te word. Trouens dit gaan waarskynlik die lekkerste vakansie van jou lewe word. Daar sal niks van jou gevra word wat die toerleiers nie ook bereid is om te doen nie.

Die Meisie-Vasbyt verskil van die manne se Kalahari-Vasbyt in die sin dat ons besef dat water belangrik is vir meisies. Ons streef dus daarna om sover moontlik in kampe met goeie geriewe te bly, maar in die Caprivi gaan daar net basiese geriewe wees. Meisies is dalk effens minder daarop ingestel om hulself fisies te bewys en wil beslis nie letsels hê in hul gesigte ens nie. Die vereistes word aangepas om by die meisies te pas. Dit sal egter vir die gemiddelde meisie net so moeilik wees soos wat die Kalahari-Vasbyt vir die seuns is.

Die Meisie-Vasbyt is 'n gesubsidieerde kursus. Fondse word deursigtig hanteer en alle gelde wat jy betaal (en die van ons borge) word tot die toerlede se voordeel aangewend. Ons glo dat jongdames wat daarvan droom om 'n verskil in die wêreld te maak, eenvoudig die kursus moet doen. Dit gaan jou 'n besliste voorsprong in die lewe gee wat moeilik ingehaal sal kan word.

Ons toer begin op 20 Sept om 06:00 op Kaapstad Internasionaal en jy sal betyds terug wees vir skool op 1 Oktober. Meisies wat matriekafskeid verpligtinge het, moet daarop let dat die toer dalk daarmee kan bots.

 

 

Deur vir hierdie avontuur in te skryf verbind jy jouself daartoe om hard te werk en ʼn groot sukses daarvan te maak. As jy nie belangstel nie, is jy welkom om by die huis te bly. As jy saamkom sal jy ook moet saamwerk.

Ons verkies dat meisies van graad 10 die kursus bywoon, maar graad 11's is ook welkom.

Die koste van hierdie toer sal R18 000 beloop. Dit sluit alle etes, vervoer en ontspanning in. Witwater rafting, Bungi Jumping en die Victoria Watervalle is ook ingesluit. Dit alleen kos meer as R3000 per persoon, maar is ingesluit by die prys. Ook die vliegtuigkaartjie vanaf Johannesburg tot Victoria Falls en terug tot in Johannesburg is ingesluit. Dit is ʼn uitdruklike voorwaarde vir deelname aan die toer dat jy nie meer as R700-00 sakgeld mag saamneem nie.

Die toer is vol aangename verassings. Tog is dit ook belangrik om daarop te let dat jy fiks terug gaan kom. Boonop sal daar van jou verwag word om die aangehegte beginsels te onderskryf.

Op hierdie toer rook en drink ons nie en dit geld ook vir my. Ons kry saam swaar en ons speel saam, al kry dié wat ouer is as 60, so ʼn bietjie afslag tydens PT. Wat julle eet en drink, eet en drink ons. As daar koeldrank is kry die volwassenes slegs as daar oorbly en as ons eet, eet die volwassenes laaste. As ons ʼn luukse vir ons gun, maak ons seker dat julle ook daarin deel. Dit is die gees van die Meisie-Vasbyt en dit is ons enigste belofte aan jou.

As jy ʼn meisie met karakter is wat avontuur wil beleef, lang ente wil bestuur in die veld, die omgewing wil leer ken en wil uitstyg bo die gemiddelde, is hierdie kursus waarskynlik net waarvoor jy gewag het.